ஐந்து ஒலிம்பிக் தங்கப் பதக்க வீரர் டெடி ரினே (Teddy Riner) பிரான்ஸ் ஜனாதிபதிப் போட்டியில்
ஐந்து ஒலிம்பிக் (Olympic) தங்கப் பதக்கங்களை வென்ற பிரெஞ்சு ஜூடோ (judo) வீரர் டெடி ரினே (Teddy Riner), வரவிருக்கும் பிரான்ஸ் ஜனாதிபதித் தேர்தலில் (presidential election) போட்டியிடுவதாக நவம்பர் 9 திங்கட்கிழமை அறிவித்தார்; தேர்தலுக்கு இன்னும் ஆறு மாதங்களுக்கும் குறைவான காலமே உள்ளது.
அளித்த நேர்காணலில், தாம் 'இடதுசாரியும் அல்ல, வலதுசாரியும் அல்ல' என்றும், ஒற்றுமையின் வேட்பாளராக இருக்க விரும்புவதாகவும் அவர் தெரிவித்தார். தம் விளையாட்டு வாழ்க்கையை நிறுத்தப் போவதில்லை என்றும், மக்கள் அனுமதித்தால் 2028 லாஸ் ஏஞ்சலஸ் ஒலிம்பிக்கிலும் (LA Olympics) பங்கேற்க விரும்புவதாகவும் அவர் கூறினார். எக்ஸ் (X) தளத்தில் பகிர்ந்த காணொளியில், 'பிரான்சுக்கு அவசியம் நாள் முழுக்க உபதேசித்துச் சண்டையிடும் தொழில் அரசியல்வாதி அல்ல; நியாயமான சிந்தனையும் நல்லெண்ணமும், விடயங்களை ஒழுங்குபடுத்தும் அரசும்' என்று அவர் கூறினார்.
37 வயதான அவர், அரசியல் முன்னனுபவமோ 'சரியான தொடர்புகளோ' இல்லாத தன்னை மக்கள் 'பைத்தியம்' எனக் கருதுவார்கள் என எதிர்பார்ப்பதாகவும்; 'அழுத்தத்திற்குத் தலைவணங்க மறுப்பதும் குழப்பத்தை ஏற்க மறுப்பதும் பைத்தியம் எனில், நான் முழுமையாகப் பைத்தியம்தான்' என்றும் அவர் கூறினார். 'நாடு எரிவதைப் பார்த்துக்கொண்டு சாக்குகள் தேடுபவர்களில் நான் இருக்கமாட்டேன். போராட்டம் என் இயல்பு; வீழ்வதும் மீண்டும் எழுவதும் எனக்குத் தெரியும்' என்றும் அவர் தெரிவித்தார்.
2012, 2016 மற்றும் 2024 ஒலிம்பிக் போட்டிகளில் கனத்தரப் பிரிவிலும் (heavyweight), 2020 மற்றும் 2024 கலப்பு அணிப் போட்டிகளிலும் (mixed team) தங்கம் வென்ற அவர், 11 உலக சாம்பியன் பட்டங்களையும் கொண்டுள்ளார். மற்றொரு பிரெஞ்சு ஜூடோ வீரர் டேவிட் துயே (David Douillet) 2009 இல் பிரெஞ்சு நாடாளுமன்றத்திற்குத் தேர்ந்தெடுக்கப்பட்டு, 2011 செப்டம்பர் முதல் 2012 மே வரை விளையாட்டு அமைச்சராகவும் பணியாற்றியது குறிப்பிடத்தக்கது.
இதற்கிடையில், தேர்தல் களத்தில் தூர-வலதுக் கட்சியான தேசிய ஒன்றியத்தின் (National Rally) மரீன் ல பென் (Marine Le Pen) 36 வீத ஆதரவுடன் கருத்துக் கணிப்புகளில் முன்னிலையில் உள்ளார்; அவரைத் தொடர்ந்து கடும்-இடதுசாரிக் கட்சியான அடங்கா பிரான்ஸின் (France Unbowed) ஜோன்-லுக் மெலன்சோன் (Jean-Luc Melenchon) 17.6 வீத வாக்கு எண்ணங்களுடன் உள்ளார் என அக்டோபர் இறுதியில் நடைபெற்ற ஐஃபோப் (IFOP) கருத்துக் கணிப்பு தெரிவிக்கிறது.
