ஈரானின் அணுசக்தி ரகசியங்களுக்கு 20 மில்லியன் டாலர் பரிசு அறிவித்த அமெரிக்கா (America)

ஈரானின் அணுசக்தி (nuclear) ரகசியங்கள் குறித்துத் தகவல் தெரிவிப்பவர்களுக்கு 20 மில்லியன் டாலர், அதாவது சுமார் 170 கோடி இந்திய ரூபாய் வரை பரிசு வழங்கப்படும் என்று அமெரிக்கா அறிவித்துள்ளது. அமெரிக்க வெளியுறவுத் துறையின் நீதிக்கான வெகுமதிகள் (Rewards for Justice) திட்டத்தின் கீழ் இந்த அறிவிப்பு வெளியிடப்பட்டுள்ளது.

ஈரானின் அணுசக்தி மையங்கள், யுரேனியம் செறிவூட்டும் கருவிகள் (uranium enrichment), விஞ்ஞானிகள் மற்றும் அணுசக்தி தொடர்பான முக்கியப் பொருட்கள் எங்கு உள்ளன என்ற தகவல்களை வழங்குபவர்களுக்கு இந்தப் பரிசு வழங்கப்படும். தகவல் அளிப்பவர்களுக்கு ஈரானிலிருந்து பாதுகாப்பாக வெளியேறவும் உதவப்படும் என அமெரிக்கா தெரிவித்துள்ளது.

2025-ஆம் ஆண்டு ஜூன் மாதம் நடத்தப்பட்ட நள்ளிரவு சுத்தியல் நடவடிக்கை (Operation Midnight Hammer) என்ற கூட்டு ராணுவத் தாக்குதலில், ஈரானின் ஃபோர்டோ (Fordow), நட்டான்ஸ் (Natanz) மற்றும் இஸ்பஹான் (Isfahan) ஆகிய இடங்களில் உள்ள அணுசக்தி மையங்கள் முற்றிலும் அழிக்கப்பட்டதாக அமெரிக்க அதிபர் டொனால்ட் டிரம்ப் (Donald Trump) அறிவித்திருந்தார். ஆனால் அமெரிக்கப் (America) பாதுகாப்பு உளவுத்துறை (Defense Intelligence Agency) மற்றும் சர்வதேச அணுசக்தி முகமை (International Atomic Energy Agency - IAEA) இக்கூற்றை ஏற்கவில்லை; தாக்குதல்கள் ஈரானின் அணுசக்தித் திட்டத்தைச் சில மாதங்கள் மட்டுமே தாமதப்படுத்தியிருக்கக் கூடும் என்ற தகவல்கள் வெளியாகியிருந்தன.

நட்டான்ஸ் அணுசக்தி மையத்திற்கு அருகில் மலைக்கு அடியில் அமைந்துள்ள நிலத்தடி மையத்தை அமெரிக்கா தாக்கக்கூடும் என்று டிரம்ப் அண்மையில் எச்சரித்த நிலையில், தற்போது இவ்வளவு பெரிய தொகையைப் பரிசாக அறிவித்திருப்பது கவனத்தை ஈர்த்துள்ளது. ஈரானின் அணுசக்தித் திட்டம் குறித்த முழுமையான தகவல்களைப் பெற அமெரிக்கா முயல்வதாக இது காட்டுவதாகப் பார்வையாளர்கள் கருதுகின்றனர்.