யாழ்ப்பாணம் (Jaffna) சிறுவர் இல்லத்தில் மாணவர் தாக்குதல்: மூடிமறைப்புக் குற்றச்சாட்டுடன் விசாரணை கோரிக்கை

யாழ்ப்பாணம் (Jaffna) திருநெல்வேலியில் (Thirunelveli) அமைந்துள்ள சைவச் சிறுவர் இல்லத்தைச் சேர்ந்த மாணவர் ஒருவர், அங்கு பணியாற்றும் ஆசிரியர் ஒருவரால் தாக்கப்பட்டு தலையில் பலத்த காயங்களுக்கு உள்ளாகியுள்ளதாகத் தெரிவிக்கப்படுகிறது.

சம்பவம் தொடர்பில் தெரியவருவதாவது, காயங்களுடன் கூடிய மாணவர், யாழ்ப்பாணம் போதனா வைத்தியசாலைக்கு (Jaffna Teaching Hospital) அழைத்துச் செல்லப்படாமல், ஒரு தனியார் வைத்தியசாலையில் அனுமதிக்கப்பட்டுச் சிகிச்சை அளிக்கப்பட்டுள்ளார். அரச வைத்தியசாலையில் அனுமதித்தால் சட்ட நடவடிக்கைகளுக்குப் பதிலளிக்க நேரிடும் என்ற காரணத்தால், சம்பவத்தை மூடிமறைக்கும் நோக்குடன் இவ்வாறு செய்யப்பட்டதாகக் குற்றச்சாட்டுகள் எழுந்துள்ளன.

இதற்கிடையில், குறித்த ஆசிரியர் இல்ல மாணவர்களுக்கு இரவு நேரக் கற்பித்தலுக்காக, இல்லத்தின் முகாமைத்துவச் சபையின் (management board) அனுமதியின்றி, சைவ வித்தியா விருத்திச் சங்கத்தின் (Saiva Vidya Vriddhi Sangam) கல்வித்திட்டப் பணிப்பாளரின் பரிந்துரையின் கீழ் முறையற்ற விதத்தில் பணிக்கு அமர்த்தப்பட்டிருந்ததாகத் தெரிவிக்கப்படுகிறது. அந்த ஆசிரியரின் தவறான நடத்தைகள் உள்ளிட்ட பல்வேறு குற்றச்சாட்டுகளை முகாமைத்துவச் சபையின் செயலாளர் உள்ளிட்ட தரப்பினர் ஏற்கனவே முன்வைத்திருந்த போதிலும், சங்கத் தலைவர் உள்ளிட்டோர் எவ்வித நடவடிக்கையும் எடுக்கவில்லை என்றும் குற்றம் சாட்டப்படுகிறது.

மாணவர் மீதான தாக்குதல் சம்பவம் தொடர்பில் பொலிஸாரிடம் முறைப்பாடு செய்யப்பட்டு, பொலிஸார் ஊடாக சிறுவர் நீதிமன்றத்திற்கும் (Juvenile Court) அறிக்கையிடப்பட்டிருக்க வேண்டும். இருப்பினும், சைவ வித்தியா விருத்திச் சங்க நிர்வாகம் இது தொடர்பில் எந்த நடவடிக்கையும் எடுக்கவில்லை என்றும், சிறுவர் நன்னடத்தைப் பிரிவினருக்கு (Child Welfare Division) தெரிந்தும் விசாரணைகளோ நடவடிக்கைகளோ மேற்கொள்ளப்படவில்லை என்றும் தெரிவிக்கப்படுகிறது.

இந்நிலையில், சம்பவம் தொடர்பில் உரிய விசாரணைகளை முன்னெடுக்க வேண்டும் என்றும், ஆசிரியர் பணிக்கு அமர்த்தப்பட்ட முறைமை தவறு என்றும் கோரிய வித்தியா விருத்திச் சங்கத்தின் பொதுச் சபை செயலாளரை நிர்வாகத்தைச் சேர்ந்த சிலர் தாக்க முயற்சித்ததாகவும் கூறப்படுகிறது.

இதனிடையே, தாக்குதல் சம்பவம் தொடர்பில் சிறுவர் நன்னடத்தைத் திணைக்களம், சிறுவர் நீதிமன்று மற்றும் வடமாகாண ஆளுநர் (Northern Province Governor) உள்ளிட்ட தரப்பினர் உரிய விசாரணைகளை முன்னெடுக்க வேண்டும் என்றும், சம்பவம் தொடர்பில் உரிய தரப்பினருக்கு முறையாகக் கடிதம் மூலம் முறைப்பாடுகளை வழங்க வேண்டும் என்றும் சம்பந்தப்பட்ட செயலாளர் வலியுறுத்தியுள்ளார்.